|| śrīḥ || || śrīcandramaulīśvarāya namaḥ || || śrīkāraṇaparacidrūpāyai namaḥ || śrīkāmākṣīparadevatāyāḥ pādāravindayoḥ bhaktibhareṇa samarpitam || || śrīḥ || || śrī lalitā stava ratnam || asya śrī lalitā stava ratnamālā mahāmantrasya | bhagavān śrī durvāsa ṛṣiḥ | paṅktiḥ chandaḥ | saparivāra śrīlalitā mahātripurasundarī devatā || aiṁ - tāpiñcamecakābhāṁ tālīdalaracita karṇatāṭaṅkām | tāmbūla pūrita mukhīṁ tāmrādhara bimba darahāsām || bījam || sauḥ - dhūrtānāmatidūrā vārtā śeṣāvalagna kamanīyā | ārtālī śubhadātrī vārtālī bhavatu vāñcitārthāya || śaktiḥ || kḻīṁ - ādimarasāvalambāṁ anidaṁ prathamāktivallarīkalikam | ābrahmakīṭajananīṁ antaḥ kalayāmi sundarīmaniśam || kīlakam || mama saparivāra śrī lalitā mahātripurasundarī prasāda siddhidvārā sarvābhīṣṭa sidyarthe pārāyaṇe viniyogaḥ | kuṅkuma lalāma bhāsvanniṭilāṁ kuṭilatarachillikā yugalām | nālīka tulyanayanāṁ nāsāñcala naṭita mauktikābharaṇām || aṅguṣṭābhyāṁ namaḥ | hṛdayāya namaḥ || 1 || aṅkūrita mandahāsāṁ aruṇādharakānti vijita bimbābhām | kastūrī makarīyuta kapola saṁkrānta kanakatāṭaṅkām || tarjanībhyāṁ namaḥ | śirase svāhā || 2 || karpūra sāndravīṭī kabalita vadanāravinda kamanīyām | kambusahodara kaṇṭha pralambamānācchamauktika kalāpām || madhyamābhyāṁ namaḥ | śikhāyai vaṣaṭ || 3 || kalhāradāmakomala bhujayugala sphurita ratnakeyūrām | karapadmamūla vilasat kāñcanamaya kaṭakavalaya saṁdohām || anāmikābhyāṁ namaḥ | kavacāya huṁ || 4 || pāṇi catuṣṭaya vilasat pāśāṅkuśa puṇḍracāpa puṣpāsrām | kūlaṅkaṣakuca śikharāṁ kuṅkuma kardamita ratnakūrpāsām || kaniṣṭikābhyāṁ namaḥ | netratrayāya vauṣaṭ || 5 || kamalabhava kañjalocana kirīṭa ratnāṁśu rañjita padābjām | unmastakānukampā muttaralāpāṅka poṣitānaṅgām || karatalakarapṛṣṭābhyāṁ namaḥ | astrāya phaṭ | bhūrbhuvassuvaromiti digbandhaḥ || 6 || || dhyānam || ādima rasāvalambām anidaṁ prathamokti vallarīkalikām | ābrahmakīṭajananīṁ antaḥ kalayāmi sundarīṁ aniśam || 1 || natajanasulabhāya namo nālīkasanābhilocanāya namaḥ | nandita giriśāya namo mahase navanīpapāṭalāya namaḥ || 2 || pavanamayi pāvakamayi kṣoṇīmayi gaganamayi kṛpīṭamayi | ravimayi śaśimayi diṅmayi samayamayi prāṇamayi śive pāhi || 3 || kāli kapālini śūlini bhairavi mātaṅgi pañcami tripure | vāgdevi vindhyavāsini bāle bhuvaneśi pālaya ciraṁ mām || 4 || lamityādi pañcapūjā || tataḥ pārāyaṇāntaram hṛdayādi nyāsaṁ vidhāya dhyātvā pañcopacāreḥ sampūjayet || || śrīḥ || || śrī lalitā mahātripurasundaryai namaḥ || śrī krodhabhaṭṭārakāpara nāmadheya śrī durvāsa maharṣi praṇīta || śrī lalitā stava ratnam || (āryā dviśatī) vande gajendravadanaṁ vāmāṅkārūḍha vallabhāśliṣṭam | kuṅkuma parāgaśoṇaṁ kuvalayinī jāra korakāpīḍam || 1 || sa jayati suvarṇaśailaḥ sakalajagaccakra saṅghaṭita mūrtiḥ | kāñcana nikuñjavāṭī kandalamarī prapañca saṁgītaḥ || 2 || harihaya nairṛtamāruta haritāmanteṣvavasthitaṁ tasya | vinumaḥ sānu tritayaṁ vidhihari gaurīśa viṣṭapādhāram || 3 || madhye punarmanohara ratnarucistabaka rañjita digantam | upari catuḥ śata yojanamuttaṅga śrṛṅga puṅgavamupāse || 4 || tatra catuḥ śata yojana pariṇāhaṁ devaśilpinā racitam | nānā sālamanojñe namāmyahaṁ nagaramādi vidyāyāḥ || 5 || prathamaṁ sahasrapūrvaka ṣaṭśata saṁkhyāka yojanaṁ paritaḥ | valayīkṛta svagātraṁ varaṇaṁ śaraṇaṁ vrajāmyayo rūpam || 6 || tasyottare samīraṇa yojanadūre taraṅgitacchāyaḥ | ghaṭayatu mudaṁ dvitīyo ghaṇṭāsvana sāra nirmitaḥ sālaḥ || 7 || ubhayorantara sīmanyuddāma bhramara rañjitodāram | upavamanamupāsmahe vayamūrīkṛta mandamāruta syandam || 8 || āliṅgya bhadrakāḻī māsīnastatra hariśilāśyāmām | manasi mahākālo me viharatu madhupāna vibhramannetraḥ || 9 || tārttīyīko varaṇastasyottara sīmni vātayojanataḥ | tāmreṇa racita mūrtistanutādā candratārakaṁ bhadram || 10 || madhye tayośca maṇimaya pallavaśākhā prasūna pakṣmalitām | kalpānokahavāṭīṁ kalaye makaranda paṅkilāvālām || 11 || tatra madhumādhavaśrī taruṇībhyāṁ taraladṛkcakorābhyām | āliṅgito'vatānmāmaniśaṁ prathamarturāttapuṣpāsraḥ || 12 || namata taduttarabhāge nākipathollaṅghiśrṛṅga saṁghātam | sīsākṛtiṁ turīyaṁ sitakiraṇāloka nirmalaṁ sālam || 13 || sāladvayāntarāle saralālikapotacāṭu subhagāyām | santānavāṭikāyāṁ saktaṁ ceto'stu satatamasmākam || 14 || tatra tapanādi rūkṣaḥ sāmrājñīcaraṇa sāndritasvāntaḥ | śukra śuciśrī sahito grīṣmarturdiśatu kīrtimākalpam || 15 || uttarasīmani tasyonnata śikharotkampi hāṭaka patākaḥ | prakaṭayatu pañcamo naḥ prākāraḥ kuśalamāra kūṭamayaḥ || 16 || prākārayośca madhye pallavitānyabhṛta pañcamonmeṣā | haricandanadruvāṭīharatādāmūlamasmadanutāpam || 17 || tatra nabhaśrī mukhyaistaruṇī vargaiḥ samanvitaḥ paritaḥ | vajrādṛhāsa mukharo vāñchāpūrtiṁ tanotu varṣartuḥ || 18 || mārutayojanadūre mahanīyastasya cottare bhāge | bhadraṁ kṛṣīṣṭa ṣaṣṭhaḥ prākāraḥ pañcalohadhātumayaḥ || 19 || anayormadhye saṁtatamaṅkūraddivya kusuma gandhāyām | mandāra vāṭikāyāṁ mānasamaṅgīkarotu me vihṛtim || 20 || tasyāmiṣorjalakṣmī taruṇībhyāṁ śaradṛtuḥ sadā sahitaḥ | abhyarcayansa jīyādambāmāmodameduraiḥ kusumaiḥ || 21 || tasyarṣi saṁkhyayojanadūre dedīpyamāna śṛṅgaughaḥ | kaladhauta kalitamūrtiḥ kalyāṇaṁ diśatu saptamaḥ sālaḥ || 22 || madhye tayormarutpatha laṅghithaviṭapāgra virutakalakaṇṭhā | śrīpārijātavāṭī śriyamaniśaṁ diśatu śītaloheśā || 23 || tasyāmatipriyābhyāṁ sahakhelansahasahasya lakṣmībhyām | sāmanto jhaṣaketorhemanto bhavatu hemavṛddhyai naḥ || 24 || uttaratastasya mahānudbhaṭa hutbhukśi svāruṇaḥ mayūkhaḥ | tapanīya khaṇḍaracita stanutādāyuṣyamaṣṭamo varaṇaḥ || 25 || kādambavipinavāṭīmanayormadhyabhuvi kalpitā vāsām | kalayāmi sūnakoraka kandalitāmoda tundilasamīrām || 26 || tasyāmati śiśirākṛti rāsīnastapatapasya lakṣmībhyām | śivamaniśaṁ kurutānme śiśirartuḥ satata śītaḻa digantaḥ || 27 || tasyāṁ kadambavāṭyāṁ tatprasavāmodamilita madhugandham | saptāvaraṇa manojñaṁ śaraṇaṁ samupaimi mantriṇī śaraṇam 28 || tatrālaye viśāle tapanīyāracita tarala sopāne | māṇikya maṇḍapāntarmahite siṁhāsane maṇīkhacite || 29 || bindu tripañcakoṇa dvipanṛpa vasuvedadala kurekhāḍhye | cakre sadā niviṣṭāṁ ṣaṣṭhyaṣṭatriṁśa dakṣareśānīm || 30 || tāpiñchamecakābhāṁ tālīdalaghaṭita karṇatāṭaṅkām | tāmbūlapūritamukhīṁ tāmrādhara bimba dṛṣṭadarahāsām || 31 || kuṅkuma paṅkiladehāṁ kuvalaya jīvātu śāvakāvataṁsām | kokanada śoṇacaraṇāṁ kokila nikvāṇa komalālāpām || 32 || vāmāṅgagalitacūlīṁ vanamālya kadambamālikābharaṇām | muktālalanti (kānti) kāñcitamugdhālikamilitacitrakodārām || 33 || karavidhṛta kīraśāvaka kalaninada vyakta nikhila nigamārthām | vāmakuca saṅgivīṇāvādana saukhyārdhamīlitākṣiyugām || 34 || āpāṭalāṁśukadharāṁ ādirasonmeṣavāsita kaṭākṣām | āmnāya sāra gulikāṁ ādyāṁ saṁgītamātṛkāṁ vande || 35 || tasya ca suvarṇa sālasyottaratastaruṇa kuṅkumacchāyaḥ | śamayatu mama saṁtāpaṁ sālo navamaḥ sa puṣparāgamayaḥ || 36 || anayorantaravasudhāḥ praṇumaḥ pratyagra puṣparāgamayīḥ | siṁhāsaneśvarīmanucintana nistandra siddha nīrandhrāḥ || 37 || tatsālottaradeśe taruṇa japākiraṇa dhoraṇī śoṇaḥ | praśamayatu padmarāga prākāro mama parābhavaṁ daśamaḥ || 38 || antara bhūkṛtavāsānanayorapanīta cittavaimatyān | cakreśī padabhaktāṁścāraṇa vargānaharniśaṁ kalaye || 39 || sāraṅgavāhayojanadūr'saṁghaṭita ketanastasya | gomedakena racito gopāyatu māṁ samunnataḥ sālaḥ || 40 || vapradvayāntarorvyāṁ vaṭukairvividhaiśca yoginī bṛndaiḥ | satataṁ samarcitāyāḥ saṁkarṣiṇyāḥ praṇaumi caraṇābjam || 41 || p tāpasayojanadūre tasya samuttuṅgaḥ gopuropetaḥ | vāñchāpūrtyai bhavatādvajramaṇī nikara nirmito vapraḥ || 42 || varaṇadvitayāntarato vāsajuṣo vihita madhurasāsvādāḥ | rambhādi vibudhaveśyāḥ racayantu mahāntamasmadānandam || 43 || tatra sadā pravahanti taṭinī vajrābhidhā ciraṁ jīyāt | caṭulormi jālanṛtyatkalahaṁsīkulakalakvaṇitapuṣṭā || 44 || rodhasi tasyā rucire vajreśī jayati vajrabhūṣāḍhyā | vajrapradāna toṣita vajrimukha tridaśa vinuta cāritrā || 45 || tasyodīcyāṁ hariti stabakita suṣamāvalīḍha viyadantaḥ | vaiḍhūryaratna racito vaimalyaṁ diśatu cetaso varaṇaḥ || 46 || atimadhyame tayoḥ punarambācaraṇāvalambita svāntām | kārkoṭakādi nāgānkalayāmaḥ kiṁ ca balimukhāndanujān || 47 || gandhavaha saṁkhya yojanadūre gaganordhva jāṅghikastasya | vāsavamaṇi praṇīto varaṇo vardhayatu vaiduṣīṁ viśadām || 48 || madhyakṣoṇyāmanayormahendranīlātmakāni ca sarāṁsi | śātodarī sahāyānbhūpālānapi punaḥ punaḥ praṇumaḥ || 49 || āśukayojanadūre dūre tasyordhvaṁ kāntidhavalita digantaḥ | muktāviracitagātraḥ muhurasmākaṁ mude bhavatu vapraḥ || 50 || āvṛttyoradhimadhyaṁ pūrvasyāṁ diśi purandaraḥ śrīmān | abhramuviṭādhirūḍhaḥ vibhramamasmākamaniśamātanutāt || 51 || tatkoṇe vyajana sruktomara pātrasruvānna śaktidharaḥ | svāhā svadhāsametaḥ sukhayatu māṁ havyavāhanaḥ suciram || 52 || dakṣiṇadigantarāle daṇḍadharo nīlanīradacchāyaḥ | tripura padābja bhaktaṁ stirayatu mama nikhila me haṁsāṁ nikaram || 53 || tasyaiva paścimāyāṁ diśi dalitendīvara prabhāśyāmaḥ | kheṭāsi yaṣṭidhārī khedānapanayatu yātudhāno me || 54 || tasyā uttaradeśe dhavalāṅgo vipulajhaṣa varārūḍhaḥ | pāśāyudhāttapāṇiḥ vidalayatu pāśajālāni || 55 || vande taduttara haritkoṇe vāyuṁ camūrūvaravāham | korakita tatvabodhāngorakṣa pramukha yogino'pi muhuḥ || 56 || taruṇīriḍā pradhānāstisro vātasya tasya kṛtavāsāḥ | pratyagrakāpi śāyanapāna paribhrānta locanāḥ kalaye || 57 || talloka pūrvabhāge dhanadaṁ dhyāyāmi śevadhikuleśam | apimāṇibhadramukhyānambā caraṇāvalambito yakṣān || 58 || tasyaiva pūrva sīmani tapanīyā racita gopure nagare | kātyāyanī sahāyaṁ kalaye śītāṁśukhaṇḍa cūḍālam || 59 || tatpuruṣoḍaśavaraṇasthalabhājastaruṇa candracūḍālān | rudrādhyāye paṭhitānrudrāṇī sahacarānbhaje rudrān || 60 || pavamānasaṁkhya yojanadūre bālatṛṇmecakastasya | sālo marakataracitaḥ saṁpadamacalāṁ śriyaṁ ca puṣṇātu || 61 || āvṛti yugmāntarato haritamaṇī nivaha mecake deśe | hāṭakatālī vipinaṁ hālāghaṭaghaṭita viṭapamākalaye || 62 || tatraiva mantriṇīgṛhapariṇāhaṁ taralaketanaṁ sadanam | marakatasaudhamanojñaṁ dadyādāyūṣi daṇḍanāthāyāḥ || 63 || sadane tava harinmaṇi saṁghaṭite maṇḍape śatastambhe | kārtasvaramayapīṭhe kanakamayāmburuha karṇikā madhye || 64 || bindu trikoṇa vartula ṣaḍasra vṛttadvayānvite cakre | sañcāriṇī daśottara śatārṇa manurājakamalakalahaṁsī || 65 || kolavadanā kuśeśayanayanā kokāri maṇḍita śikhaṇḍā | saṁtaptakāñcanābhā sandhyāruṇa cela saṁvṛta nitambā || 66 || halamusala śaṅkhacakrāṅkuśapāśābhayavara sphurita hastā | kūlaṁkaṣānukampā kuṅkumajambālitastanā bhogā || 67 || dhūrtānāmatidūrā vārtāśeṣāvalagna kamanīyā | ārtālī śubhadātrī vārtālī bhavatu vāñchitārthāya || 68 || tasyāḥ parito devīḥ svapneśyunmattabhairavīmukhyāḥ | praṇamata jambhinyādyāḥ bhairava vargāṁśca hetuka pramukhān || 69 || pūrvokta saṁkhyayojanadūre pūyāṁśu pāṭalastasya | vidrāvayatu madārtiṁ vidrumasālo viśaṅkaṭadvāraḥ || 70 || āvaraṇayormaharniśamantara bhūmau prakāśaśālinyām | āsīnamambujāsanamabhinava sindūragauramahamīḍe || 71 || varaṇasya tasya mārutayojanato vipulagopuradvāraḥ | sālo nānāratnaiḥ saṁghaṭitāṅgaḥ kṛṣīṣṭa madabhīṣṭam || 72 || antarakakṣyā manayoraviralaśobhāpi caṇḍiloddeśām | mānikhya maṇḍapākhyāṁ mahatīmadhihṛdayamaniśamākalaye || 73 || tatra stithaṁ prasannaṁ taruṇa tamāla pravāla kiraṇābham | karṇāvalambi kuṇḍalakandalitābhīśu kavacita kapolam || 74 || śoṇādharaṁ śucismita meṇāṅka vadanamedhamāna kṛpam | mugdhaiṇamadaviśeṣaka mudrita niṭilendurekhikā ruciram || 75 || nālīkadala sahodara nayanāñcala ghaṭita manasijākūtam | kamalā kaṭhiṇapayodhara kastūrīdhusṛṇa paṅkiloraskam || 76 || cāmpeyagandhi kaiśyaṁ śampāsa ahmacāri kauśeyam | śrīvatsakaustubhadharaṁ śritajanarakṣā dhurīṇa caraṇābjam || 77 || kambusudarśanavilasatkarapadmaṁ kaṇṭhalolavanamālam | mucukundamokṣaphaladaṁ mukundamānandakandamavalambe || 78 || tadvaraṇottara bhāge tārāpati bimba cumbi nija śrṛṅgaḥ | vividhamaṇīgaṇaghaṭito vitaratu sālo vinirmalāṁ dhiṣaṇām || 79 || prākāradvitayāntarakakṣyāṁ pṛthuratnanikara saṁkīrṇām | namata sahasrastambhakamaṇḍapa nāmnāti viśrutāṁ bhuvane || 80 || praṇumastatra bhavānī sahacaramīśānamindu khaṇḍadharam | śrṛṅgāranāyikāmanuśīlana bhājo'pi bhṛṅgi nandi mukhān || 81 || tasyaiṇavāhayojanadūre vande manomayaṁ vapram | aṅkūranmaṇi kiraṇāṁ antarakakṣyāṁ ca nirmalāmanayoḥ || 82 || tatraivāmṛtavāpīṁ taralataraṅgāvalīḍha taṭayugmām | muktāmaya kalahaṁsī mudrita kanakāravinda saṁdohām || 83 || śakropalamayabhṛṅgī saṁgītonmeṣaghoṣitadigantām | kāñcanamayāṅgaṁ vilasat kāraṇḍavaṣaṇḍatāṇḍavamanojñām || 84 || kuruvindātmaka hallakakoraka suṣamāsamūhapāṭalitām | kalaye sudhāsvarūpāṁ kandalitāmandakairavāmodām || 85 || tadvāpikāntarāle tarale maṇipotasīmni viharantīm | sindūrapāṭalāṅgīṁ sitakiraṇāṅkūrakalpitavataṁsām || 86 || pūrnendubimbavadanāṁ pallavaśoṇādharasphuritahāsām | kuṭilakavarīṁ kuraṅgīśiśunayanāṁ kuṇḍalasphuritagaṇḍām || 87 || nikaṭasthapotanilayāḥ śaktīḥ śayavidhṛtahemaśrṛṅgajalaiḥ | pariṣiñcantīṁ paritastārāṁ tāruṇyagarvitāṁ vande || 88 || prāguktasaṁkhyayojanadūre praṇamāmi buddhimayasālam | anayorantarakakṣyāṁ aṣṭāpadapuṣṭamedinīṁ rucirām || 89|| kādambarīnidhānāṁ kalayāmyānandavāpikāṁ tasyām | śoṇāśma nivaha nirmita sopāna śreṇiśobhamānataṭīm || 90 || māṇikyataraṇinilayāṁ madhye tasyā madāruṇakapolām | amṛteśītyabhidhānāmantaḥ kalayāmi vāruṇīṁ devīm || 91 || sauvarṇakenipātanahastāḥ saundaryagarvitā devyaḥ | tatpuratasthitibhājo vitarantvasmākamāyuṣāṁ vṛddhim || 92 || tasya pṛṣadaśvayojanadūre'haṁkāra sālamati tuṅgam | vande tayośca madhye kakṣyāṁ valamānamalayapavamānām || 93 || vinumo vimarśavāpīṁ sauṣumna sudhāsvarūpiṇīṁ tatra | velātilaṅghyavīcī kolāhalabharita kūlavanavāṭīm || 94 || tatraiva salilamadhye tāpiñcadala prapañca suṣamābhām | śyāmaḻa kañcukalasitāṁ śyāmāviṭabimbaḍambaraharāsyām || 95 || ābhugnamasṛṇacillī hasitāyugmaśarakārmuka vilāsām | mandasmitāñcitamukhīṁ maṇimayatāṭaṅkamaṇḍitakapolām || 96 || kuruvindataraṇinilayāṁ kulācalaspardhi kucanamanmadhyām | kuṅkumaviliptagātrīṁ kurukullāṁ manasi kurmahe satatam || 97 || tatsālottarabhāge bhānumayaṁ vapramāśraye dīptam | madhye ca vipulamanayormanye viśrāntamātapodgāram || 98 || tatra kuruvindapīṭhe tāmarase kanakakarṇikāghaṭite | āsīnamaruṇavāsasamamlāna prasavamālikābharaṇam || 99 || cakṣuṣmatī prakāśana śakticchāyāsamāracita kelim | māṇikyamukuṭaramyaṁ manye mārtāṇḍabhairavaṁ hṛdaye || 100 || indumayasālamīḍe tasyottaratastuṣāragirigauram | atyantaśiśiramārutamanayormadhyaṁ ca candrikodgāram || 101 || tatra prakāśamānaṁ tārānikaraiśca (sarvatassevyam) pariṣkṛtoddeśam | amṛtamaya kānti kandalamantaḥ kalayāmi kundasitamindum || 102 || śrṛṅgārasālamīḍe śrṛṁgollasitaṁ taduttare bhāge | madhyasthale tayorapi mahitāṁ śrṛṅgārapūrvikāṁ parikhām || 103 || tatra maṇinausthitābhistapanīyāracita śrṛṅgahastābhiḥ | śrṛṅgāradevatābhiḥ sahitaṁ parikhādhipaṁ bhaje madanam || 104 || śrṛṅgāravaraṇavaryasyottarataḥ sakalavibudhasaṁsevyam | cintāmaṇigaṇaracitaṁ cintāṁ dūrīkarotu me sadanam || 105 || maṇisadana sālayoradhimadhyaṁ daśatālabhūmiruhadīrghaiḥ | parṇaiḥ suvarṇavarṇaiḥ yuktāṁ kāṇḍaiśca yojanottuṅgaiḥ || 106 || mṛdulaistālīpañcakamānairmilitāṁ ca kesarakadambaiḥ | saṁtatagalitamarandasroto niryanmilindasaṁdohām || 107 || pāṭīrapavanabālaka dhāṭīniryatparāga piñjaritām | kalahaṁsīkula kalakalakūlaṁkaṣa ninadanicaya kamanīyām || 108 || padmāṭavīṁ bhajāmaḥ parimaḻakallola pakṣmalopāntām | valayita mūrtirbhagavān vahniḥkośonnataściraṁ pāyāt || 109 || tatrādhāre devyāḥ pātrīrūpaḥ prabhākaraḥ śrīmān | dvādaśakalāsameto dhvāntaṁ mama bahulamāntaraṁ bhindyāt || 110 || tasmindineśapātre taraṅgitāmodamamṛtamayamarghyam | candrakalātmakamamṛtaṁ sāndrīkuryādamandamānandam || 111 || amṛte tasminnabhito viharantyo vividhataraṇibhājaḥ | ṣoḍaśakalāḥ sudhāṁśoḥ śokāduttārayantu māmaniśam || 112 || tatraiva vihṛtibhājo dhātṛmukhānāṁ ca kāraṇeśānām | sṛṣṭyādi rūpikāstāḥ śamayantvakhilāḥ kalāśca saṁtāpam ||113 || kīnāśavaruṇa kinnararājadiganteṣu ratnagehasya | kalayāmi tānyajasraṁ kalayantvāyuṣyamarghyapātrāṇi || 114 || pātrasthalasyapurataḥ padmāramaṇavidhipārvatīśānām | bhavanāni śarmaṇeno bhavantu bhāsā pradīpita jaganti || 115 || sadanasyānalakoṇe satataṁ praṇamāmi kuṇḍamāgneyam | tatrasthitaṁ ca vahniṁ taralaśikhājaṭilamambikājanakam || 116 || tasyāsuradiśi tādṛśa ratnaparisphurita parvanavakāḍhyam | cakrātmakaṁ śatāṅgaṁ śatayojanamunnataṁ bhaje divyam || 117 || tatraiva diśi niṣaṇṇaṁ tapanīyadhvaja paramparāśliṣṭam | rathamaparaṁ ca bhavānyāḥ racayāmo manasi ratnamayacūḍam || 118 || bhavanasya vāyubhāge pariṣkṛto vividha vaijayantībhiḥ | racayatu mudaṁ rathendraḥ saciveśānyāḥ samastavandyāyāḥ || 119 || kurmo'dhihṛdayamaniśaṁ kroḍāsyāyāḥ śatāṅkamūrdhanyam | rudradiśi ratnadhāmno rucirapatākā prapañcakañcukitam || 120 || parito devīdhāmnaḥ praṇītavāsā manusvarūpiṇyaḥ | kurvantu raśmimālākṛtayaḥ kuśalāni devatā nikhilāḥ || 121 || prāgdvārasya bhavānīdhāmnaḥ pārśvadvayāracitavāse | mātaṅgī kiṭimukhyau maṇisadane manasi bhāvayāmi caram || 122 || yojanayugalābhogā tatkośapariṇāhayaiva bhityā ca | cintāmaṇigṛha bhūmirjīyādāmnāyamaya caturdvārā || 123 || dvāre dvāre dhāmnaḥ piṇḍībhūtā navīna bimbābhāḥ | vidadhatu vipulāṁ kīrtiṁ divyā lauhityasiddhyo devyaḥ || 124 || maṇisadanasyāntarato mahanīye ratnavedikāmadhye | bindumayacakramīḍe pīṭhānāmupari viracitā vāsam 125 || cakrāṇāṁ sakalānāṁ prathamamadhaḥ sīmaphalakavāstavyāḥ | aṇimādisiddhayo māmavantu devī prabhāsvarūpiṇyaḥ || 126 || aṇimādi siddhiphala kasyopari hariṇāṅkakhaṇḍakṛtacūḍāḥ | bhadraṁ pakṣmalayantu āhmī pramukhāya mātaro'smākam || 127 || tasyopari maṇiphalake tāruṇyottuṅga pīnakucabhārāḥ | saṁkṣobhiṇīpradhānā bhrāntiṁ vidrāvayantu daśamudrāḥ || 128 || phalakatrayasvarūpe pṛthule trailokyamohanecakre | dīvyantu prakaṭākhyāstāsāṁ kartrīṁ ca bhagavatī tripurā || 129 || tadupari vipule dhiṣṇye tarala dṛśastaruṇa kokanadabhāsaḥ | kāmākarṣaṇyādyāḥ kalaye devīḥ kalādharaśikhaṇḍāḥ || 130 || sarvāśāparipūrakacakre'sminguptayoginī sevyāḥ | tripureśī mama duritaṁ tudyātkaṇṭhāvalambimaṇihārā || 131 || tasyopari maṇipīṭhe tāmrāmbhoruhadalaprabhāśoṇāḥ | dhyāyāmyanaṅgakusumāpramukhā devīścavidhṛtakūrpāsāḥ || 132 || saṁkṣobhakārake'smiṁścakre śrītripurasundarī sākṣāt | goptrī guptarākhyāḥ gopāyatumāṁ kṛpārdrayā dṛṣṭyā || 133 || saṁkṣobhiṇīpradhānāḥ śaktīstasyordhvavalayakṛtavāsāḥ | ālolanīlaveṇīrantaḥ kalayāmi yauvanonmattāḥ || 134 || saubhāgyadāyake'smiṁścakreśī tripuravāsinī jīyāt | śaktīśca saṁpradāyābhidhāḥ samastāḥ pramodayantvaniśam || 135 || maṇipīṭhopari tāsāṁ mahati caturhasta vistṛte valaye | saṁtata viracitavāsāḥ śaktīḥ kalayāmi sarvasiddhimukhāḥ || 136 || sarvārthasādhakākhye cakre'muṣminsamastaphaladātrī | tripurāśrīrmamakuśalaṁ diśatāduttīrṇayoginīsevyā || 137 || tāsāṁ nilayasyopari dhiṣnyekausumbha kañcukamanojñāḥ | sarvajñādyā devyaḥ sakalāḥ saṁpādayantu mama kīrtim || 138 || cakre samastarakṣākara nāmnyasminsamastajana sevyām | manasi nigarbhāsahitāṁ manye tripuramālinī devīm || 139 || sarvajñāsadanopari cakre vipule samākalitagehāḥ | vande vaśinīmukhyāḥ śaktīḥ sindūrareṇuśoṇarucaḥ || 140 || śrīsarvarogahāriṇicakre asmiṁtripurapūrvikāṁ siddhām | vande rahasya nāmnāvedyābhiḥ śaktibhiḥ sadā sevyām || 141 || vaśinī gṛhopariṣṭādviṁśati hastonnate mahāpīṭhe | śamayantu śatrubṛndaṁ śastrāṇyastrāṇi cādidampatyoḥ || 142 || śastrasadanopariṣṭāvalaye valavairi ratnasaṁghaṭite | kāmeśvarī pradhānāḥ kalaye devīḥ samastajanavandyāḥ || 143 || cakre'tra sarvasiddhipradanāmani sarvavargaphaladātrī | tripurāmbā avatu satataṁ parāpararahasyayoginīsevyā || 144 || kāmeśvarī gṛhopari valaye vividhamanusaṁpradāyajñāḥ | catvāro yuganāthā jayantu mitreśapūrvakā guravaḥ || 145 || nāthabhavanopariṣṭānnānāratnacaya medure pīṭhe | kāmeśyādyā nityāḥkalayantu mudaṁ tithisvarūpiṇyaḥ || 146 || nityāsadanasyopari nirmalamaṇinivaha viracite dhiṣṇye | kuśalaṁ ṣaḍaṅgadevyaḥ kalayantu asmākamuttaralanetrāḥ || 147 || sadanasyopari tāsāṁ sarvānandamayanāmake bindau | pañca ahmākārāṁ mañcaṁ praṇamāmi maṇigaṇākīrṇam || 148 || parito maṇimañcasya pralambamānā niyantritā pāśaiḥ | māyāmayī yavanikā mama duritaṁ haraṁtu mecakacchāyā || 149 || mañcasyoparilambanmallīpunnāgamālikā bharitam | harigopamayavitānaṁ haratādālasyamaniśamasmākam || 150 || paryaṅkasya bhajāmaḥ pādānbimbāmbudenduhemarucaḥ | ajaharirudreśamayānanalāsura māruteśa koṇasthān || 151 || phalakaṁ sadā śivamayaṁ praṇaumi sindūrareṇu kiranābham | ārabhyāṅgeśīnāṁ sadanātkalitaṁ ratnasopānam || 152 || paṭṭopadhānagaṇḍaka catuṣṭaya sphurita pāṭalāstaraṇam | paryaṅkoparighaṭitaṁ pātu ciraṁ haṁsatūlaśayanaṁ naḥ || 153 || tasyopari nivasantaṁ tāruṇyaśrīniṣevitaṁ satatam | āvṛnta pullahallaka marīcikā puñjamañjulacchāyam || 154 || sindūraśoṇavasanaṁ śītāṁśustabaka cumbita kirīṭam | kuṅkuma tilakamanohara kuṭilālikahasita kumudabandhuśiśum || 155 || pūrṇendubimbavadanaṁ phullasarojātalocanatritayam | taralāpāṅgataraṅgita śapharāṅkanaśāstrasaṁpradāyārtham || 156 || maṇimaya kuṇḍalapuṣyanmarīcikallolamāṁsala kapolam | vidruma sahodarādhara visṛmarasmita kiśorasaṁcāram || 157 || āmodikusumaśekharamānīla bhrūlatāyugamanojñam | vīṭīsaurabhaṁ vīcīdviguṇitavaktrāravindasaurabhyam || 158 || pāśāṅkuśekṣucāpa prasavaśarasphurita komalakarābjam | kāśmīrapaṅkilāṅga kāmeśaṁ manasi kurmahe satatam || 159 || tasyāṅkabhuvi niṣaṇṇāṁ taruṇakadambaprasūna kiraṇābhām | śītāṁśukhaṇḍacūḍāṁ sīmantanyasta sāndra sindūrām || 160 || kuṅkumalalāma bhāsvanniṭilāṁ kuṭilatara cillikāyugaḻām | nālīkatulyanayanāṁ nāsāñcalanaṭita mauktikābharaṇām || 161 || aṅkurita mandahāsamaruṇādharakāntivijita bimbābhām | kastūrīmakarīyuta kapolasaṁkrānta kanakatāṭaṅkām || 162 || karpūrasāndravīṭīkabalita vadanāravinda kamanīyām | kambusahodara kaṇṭhapralambamānācchamauktika kalāpām || 163 || kalhāradāmakomalabhujayugala sphurita ratnakeyūrām | karapadmamūlavilasat kāñcanamaya kaṭakavalayasaṁdohām || 164 || pāṇicatuṣṭaya vilasat pāśāṅkuśapuṇḍracāpapuṣpāstrām | kūlaṁkaṣakucaśikharāṁ kuṅkumakardamita ratnakūrpāsām || 165 || aṇudāyādavalagnāmambuda śobhāsanābhi romalatām | māṇikyakhacita kāñcīmarīcikā krāntamāṁsala nitambām || 166 || karabhorukāṇḍayugalāṁ jaṅghājita kāmajaitra tūṇīrām | prapadaparibhūtakūrmāpallavasacchāya padayuga manojñām || 167 || kamalabhava kañjalocana kirīṭaratnāṁśu rañjita padābjām | unmastakānukumbāṁ uttaralāpāṅga poṣitānaṅgām || 168 || ādimarasāvalambāmanidaṁ prathamokti vallarīkalikām | ā ahmakīṭajananīṁ antaḥ kalayāmi sundarīmaniśam || 169 || kastu kṣitau paṭīyānvastu stotuṁ śivāṅkavāstavyam | astu ciraṁtanasukṛtaiḥ prastuta kāmyāya tanmama purastāt || 170 || prabhusammitoktigamye paramaśivotsaṅgatuṅga paryaṅkam | tejaḥ kiṁcana divyaṁ purato me bhavatu puṇḍrakodaṇḍam || 171 || madhurimabharita śarāsaṁ makarandaspandimārgaṇodāram | kairaviṇīviṭacūḍaṁ kaivalyāyāstu kiṁcana maho naḥ || 172 || akṣudramikṣucāpaṁ parokṣamavalagnasīmni tryakṣam | kṣapayatu me kṣemetaramukṣaratha prema pakṣmalaṁ tejaḥ || 173 || bhṛṅgarucisaṁgarakarāpāṅgaṁ śrṛṅgāratuṅgamaruṇāṅgam | maṅgaḻamabhaṅguraṁ me ghaṭayatu gaṅgādharāṅgasaṅgi mahaḥ || 174 || prapadajitakūrmamūrmilakaruṇaṁ bharmaruci nirmathanadeham | śritavarma marma śaṁbhoḥ kiṁcana narma mama śarmanirmātu || 175 || kālakuralālikālimakandala vijitālividhṛtamaṇivāli | milatu hṛdi pulinajalaghanaṁ bahulita galagaralakeli kimapi mahaḥ || 176 || kuṅkumatilakitaphālā kuruvindacchāyapāṭaladukūlā | karuṇāpayodhivelā kācana citte cakāstu me līlā || 177 || puṣpaṁdhayaruciveṇyaḥ pulinābhogatrapākaraśreṇyaḥ | jīyāsurikṣupāṇyaḥ kāścana kāmārikelisākṣiṇyaḥ || 178 || tapanīyāṁśukabhāṁsi drākṣāmādhuryanāstikavacāṁsi | katicanaśucaṁmahāṁsi kṣapayatu kapālitoṣitamanāṁsi || 179 || asitakacamāyatākṣaṁ kusumaśaraṁ kulamudvahakṛpārdraṁ | ādimarasādhidaivatamantaḥ kalaye harāṅkavāsimahaḥ || 180 || karṇopāntataraṅgita kaṭākṣanispandi kaṇṭhadaghnakṛpām | kāmeśvarāṅkanilayāṁ kāmapi vidyāṁ purātanīṁ kalaye || 181 || aravindakāntyaruṁtudavilocana dvandvasundaramukhenduḥ | chandaḥ kandalamandiramantaḥ puramainduśekharaṁ vande || 182 || nimbanikurumbaḍambaraviḍambakacchāyamambaravalagnam | kambugalamambudakucaṁ bimbokaṁ kamapi cumbatu mano me || 183 || kamapi kamanīyarūpaṁ kalayāmyantaḥ kadambakusumāḍhyam | campakarucirasuveṣaiḥ saṁpādita kāntyalaṁkṛta digantam || 184 || śampārucibharagarhā saṁpādaka krānti kavacita digantam | siddhāntaṁ nigamānāṁ śuddhāntaṁ kimapi śūlinaḥ kalaye || 185 || udyaddinakaraśoṇānutpalabandhustanaṁdhayāpīḍān | karakalita puṇḍracāpānkalaye kānapi kapardinaḥ prāṇān || 186 || raśanālasajjaghanayā rasanā jīvātu cāpabhāsurayā | ghrāṇāyuṣkaraśarayā ghrātaṁ cittaṁ kayāpi vāsanaya || 187 || sarasijasahayudhvadṛśā śampālatikāsanābhivigrahayā | bhāsā kayapi ceto nāsāmaṇi śobhivadanayā bharitam || 188 || navayāvakābhasicayānvitayā gajayānayā dayāparayā | dhṛta yāminīśakalayā dhiyā kayāpi kṣatāmayā hi vayam || 189 || alamalamakusumabāṇaiḥ bimbaśoṇaiḥ puṇḍrakodaṇḍaiḥ | akumudabāndhavacūḍaiḥ anyaiḥ iha jagati daivataṁ manyaiḥ || 190 || kuvalayasadṛkṣanayanaiḥ kulagirikūṭasthabandhukucabhāraiḥ | karuṇāspandikaṭākṣaiḥ kavacita citto'smi katipayaiḥ kutukaiḥ || 191 || natajanasulabhāya namo nālīkasanābhilocanāya namaḥ | nandita giriśāya namo mahase navanīpapāṭalāya namaḥ || 192 || kādambakusumadhāmne kāyacchāyākaṇāyitāryamṇe | sīmne ciraṁtanagirāṁ bhūmne kasmaicidādadhe praṇatim || 193 || kuṭilakabarībharebhyaḥ kuṅkumasa ahmacārikiraṇebhyaḥ | kūlaṁkaṣastanebhyaḥ kurmaḥ praṇatiṁ kulādrikutukebhyaḥ || 194 || kokaṇadaśoṇa caraṇātkomala kuralāli vijitaśaivālāt | utpalasugandhi nayanādurarīkurmo na devatamānyām || 195 || āpāṭalādharāṇāmānīlasnigdhabarbarakacānām | āmnāya jīvanānāmākūtānāṁ harasya dāso'smi || 196 || puṅkhitavilāsahāsasphuritāsu purāhitāṅkanilayāsu | magnaṁ manomadīyaṁ kāsvapi kāmāri jīvanāḍīṣu || 197 || lalitā pātu śiro me lalāṭāmbā ca madhumatīrūpā | bhrūyugmaṁ ca bhavānī puṣpaśarā pātu locanadvandvam || 198 || pāyānnāsāṁ bālā subhagā dantāṁśca sundarī jihvām | adharoṣṭamādiśaktiścakreśī pātu me ciraṁ cibukam || 199 || kāmeśvarī ca karṇau kāmākṣī pātu gaṇḍayoryugalam | śrṛṅgāranāyikāvyādvadanaṁ siṁhāsaneśvarī ca galam || 200 || skandaprasūśca pātu skandhau bāhū ca pāṭalāṅgī me | pāṇī ca padmanilayā pāyādaniśaṁ nakhāvalīrvijayā || 201 || kodaṇḍinī ca vakṣaḥ kukṣiṁ cāvyāt kulācalatanūjā | kalyāṇī ca valagnaṁ kaṭiṁ ca pāyātkalādharaśikhaṇḍā || 202 || ūrudvayaṁ ca pāyādumā mṛḍānī ca jānunī rakṣet | jaṅge ca ṣoḍaśī me pāyāt pādau ca pāśasṛṇi hastā || 203 || prātaḥ pātu parā māṁ madhyāhne pātu maṇigṛhādhīśā | śarvāṇī avatu sāyaṁ pāyāt rātrau ca bhairavī sākṣāt || 204 || bhāryā rakṣatu gaurī pāyāt putrāṁśca bindugṛhapīṭhā | śrīvidyā ca yaśo me śīlaṁ cāvyāściraṁ mahārājñī || 205 || pavanamayi pāvakamayi kṣoṇīmayi gaganamayi kṛpīṭamayi | ravimayi śaśimayi diṅmayi samayamayi prāṇamayi śive pāhi || 206 || kāli kapālini śūlini bhairavi mātaṅgi pañcami tripure | vāgdevi vindhyavāsini bāle bhuvaneśi pālaya ciraṁ mām || 207 || abhinavasindūrābhāṁ amba tvāṁ cintayanti ye hṛdaye | upari nipatanti teṣāmutpala nayanā kaṭākṣa kallolāḥ || 208 || vargāṣṭakamilitābhirvaśinīmukhyābhirāvṛtāṁ bhavatīm | cintayatāṁ sitavarṇāṁ vāco niryāntya yatnato vadanāt || 209 || kanakaśalākā gaurīṁ karṇavyālola kuṇḍala dvitayām | prahasitamukhīṁ ca bhavatīṁ dhyāyanto ye ta eva bhūdhanadāḥ || 210 || śīrṣāmboruhamadhye śītalapīyūṣavarṣiṇīṁ bhavatīm | anudinamanucintayatāṁ āyuṣyaṁ bhavati puṣkalamavāpyām || 211 || madhurasmitāṁ madāruṇanayanāṁ mātaṅgakumbhavakṣojām | candravataṁsinīṁ tvāṁ savidhe paśyanti sukṛtinaḥ kecit || 212 || lalitāyāḥ stavaratnaṁ lalitapadābhiḥ praṇītamāryābhiḥ | pratidinamavanau paṭhatāṁ phalāni vaktuṁ pragalbhate saiva || 213 || iti śrībhagavaddūrvāsamaharṣi praṇītaṁ lalitāstavaratnaṁ sampūrṇam | || śrī lalitā tripurasundarī caraṇārpaṇamastu || |